ਇੱਕ ਗੀਤ

 ਮੇਰਾ ਕਤਲ ਹੋਣ ਨੂੰ ਜੀਅ ਕਰਦੈ
 ਕਿਸੇ ਚੰਚਲ ਖੇਖਣਹਾਰੀ ਤੇ ,
 ਜਿੰਦ ਘੋਲ ਘੁਮਾਉਣ ਨੂੰ ਜੀਅ ਕਰਦੈ

 ਉਹ, ਨਕਸ਼ ਧੁਪੀਲੇ ਹੋਣ ਜਿਹਦੇ
 ਤੇ ਨੈਣ ਨਸ਼ੀਲੇ ਹੋਣ ਜਿਹਦੇ
 ਨਾਲੇ ਹੋਠ ਰਸੀਲੇ ਹੋਣ ਜਿਹਦੇ

 ਰੱਬ ਵਿਹਲੇ ਬੈਠ ਬਣਾਈ ਨਾਲ
 ਅੱਖੀਆਂ ਲੜਾਓਣ ਨੂੰ ਜੀਅ ਕਰਦੈ
 ਮੇਰਾ ਕਤਲ ਹੋਣ ਨੂੰ ਜੀਅ ਕਰਦੈ

 ਉਹ ਸੋਹਲ ਪੰਜਾਬਣ ਹੂਰ ਪਰੀ
 ਮਲਿਕਾ - ਏ - ਹੁਸਨ ਮਗਰੂਰ ਪਰੀ
 ਮੰਗ ਰੱਬ ਤੋਂ ਲਿਆਈ ਨੂਰ ਪਰੀ

 ਐ ਨੂਰ ਦੇ ਸਾਗਰ ਅੱਜ ਮੇਰਾ
 ਵਿਚ ਨੂਰ ਨਹਾਓਣ ਨੂੰ ਜੀਅ ਕਰਦੈ

 ਦੋ ਪਿਆਰ ਦੇ ਸਾਂਝੇ ਬੋਲ ਕਰੇ
 ਜੋ ਗੱਲ ਕਰੇ ਮਿਣ ਤੋਲ ਕਰੇ
 ਜੋ ਕਵਿਤਾ ਵਾਂਗ ਕਲੋਲ ਕਰੇ

 ਜੇ ਬਣੇ ਉਹ ਜੀਵਨ ਗੀਤ ਮੇਰਾ
 ਨਾਲ ਗੀਤ ਗਾਓਣ ਨੂੰ ਜੀਅ ਕਰਦੈ
 ਮੇਰਾ ਕਤਲ ਹੋਣ ਨੂੰ ਜੀਅ ਕਰਦੈ

ਤੇਰੀ ਤਸਵੀਰ ਨੂੰ ਅਖੀਆਂ 'ਚ ਲੈ ਕੇ ਮੀਟੀਆਂ ਅੱਖਾਂ
ਕਿਤੇ ਦਿਲ ਫੇਲ ਨਾਂ ਹੋ ਜਾਏ ਕਿਥੇ ਸਾਂਭ ਕੇ ਰੱਖਾਂ

ਗ਼ਜ਼ਲ "ਏਧਰ ਹਾਦਸੇ ਵਸਦੇ , ਚਿਰੋਕੇ ਵਾਪਰੇ ਹੋਏ"

ਨਤੀਜਾ ਨਿਕਲਿਆ ਤਾਂ ਢੇਰ ਸਾਰੇ ਤਬਸਰੇ ਹੋਏ

ਅਸੀਂ ਜੇ ਫੇਲ ਵੀ ਹੋਏ ਤਾਂ ਕਿਓਂ ਚਰਚੇ ਬੜੇ ਹੋਏ

ਬਣੇ ਜੇ ਕਲਮ ਤਾਂ ਉਹਨਾਂ ਸਿਆਹੀ ਵੀ ਲੁਕਾ ਛੱਡੀ

ਬਣਾ ਕੇ 'ਚਾਕ' ਮੈਨੂੰ ਤੇ ਉਹ ਕੁਝ ਲਿਖਕੇ ਪਰ੍ਹੇ ਹੋਏ

ਉਹ ਜੋ ਦਸ੍ਤੂਰ ਦੁਨੀਆਂ ਦੇ ਚਿਰਾਂ ਤੋਂ ਸੀ ਚਲੇ ਆਓਂਦੇ

ਮੇਰੀ ਵਾਰੀ ਜਦੋਂ ਆਈ ਤਾਂ ਵਖਰੇ ਸਿਲਸਿਲੇ ਹੋਏ

ਨਜਰ ਵਿਚ ਦਿਲ ਟਿਕਾ ਕੇ ਇਸ ਗਲੀ ਨਾਂ ਲੰਘਣਾ ਸੱਜਣ

ਕਿ ਏਧਰ ਹਾਦਸੇ ਵਸਦੇ , ਚਿਰੋਕੇ ਵਾਪਰੇ ਹੋਏ

ਉਦਾਸੀ ਇਸ ਤਰਾਂ ਵੱਸੀ ਹੈ ਸਾਹਾਂ ਮੇਰੀਆਂ ਅੰਦਰ

ਮੇਰੇ ਸ਼ੇਅਰਾਂ ਨੂੰ ਪੜ੍ਹ ਕੇ ਦੋਸਤਾਂ ਨੂੰ ਤੌਖਲੇ ਹੋਏ

ਕੁਝ ਟੱਪੇ

ਕੋਈ ਅੱਠਾਂ ਦੀਆਂ ਨੌਂ ਮਾਰਦਾ

ਇੱਕ ਤੇਰਾ ਵਿਗੋਚਾ ਨੀਂ

ਹੋਰ ਸਾਨੂੰ ਕਿਹੜਾ ਗੌਂ ਮਾਰਦਾ

ਪੜ੍ਹ ਪੜ੍ਹ ਗੱਡੇ ਲੱਦ ਲਏ

ਖੂਹ ਭਰ ਲਏ ਅਕਲਾਂ ਦੇ

ਲੰਘ ਗਏ ਮੁਖ ਫੇਰ ਕੇ

ਯਾਰ ਵੱਜਰੀ ਸ਼ਕਲਾਂ ਦੇ

ਗ਼ਜ਼ਲ "ਜੀ ਕੇ ਵੇਖੋ ਦੋਸਤੋ ਇਹ ਜਿੰਦਗੀ ਮੇਰੀ ਤਰਾਂ"

ਗ਼ਜ਼ਲ

ਜੇ ਤੁਸੀਂ ਚਾਹੁੰਦੇ ਹੋ ਪਾਓਣੀ ਹਰ ਖੁਸ਼ੀ ਮੇਰੀ ਤਰਾਂ

ਜੀ ਕੇ ਵੇਖੋ ਦੋਸਤੋ ਇਹ ਜਿੰਦਗੀ ਮੇਰੀ ਤਰਾਂ

ਮੁਸ਼ਕਿਲਾਂ ਦੇ ਦੌਰ ਵਿਚ ਵੀ ਮੁਸਕੁਰਾਓਣਾ ਸਿਖ ਲਓ

ਪਹਿਣ ਕੇ ਰਖੋ ਸਦਾ ਜਿੰਦਾ ਦਿਲੀ ਮੇਰੀ ਤਰਾਂ

ਆਪਣੇ ਹਿੱਸੇ ਦੇ ਦੁਖ ਰਖੋ ਲੁਕਾ ਕੇ ਦਿਲ ਦੇ ਵਿਚ

ਵੰਡ ਲਓ ਸਭ ਨਾਲ ਆਪਣੀ ਹਰ ਖੁਸ਼ੀ ਮੇਰੀ ਤਰਾਂ

ਸਬਰ ਦੇ ਨਾਲ ਜ਼ਿੰਦਗੀ ਨੂੰ ਜੀਣ ਦੀ ਸਿਖ ਜਾਚ ਤੂੰ

ਤੈਨੂੰ ਵੀ ਮੁਆਫਕ ਨਹੀਂ ਦੀਵਾਨਗੀ ਮੇਰੀ ਤਰਾਂ

ਇਹ ਜਦੋਂ ਵੀ ਆਓਣਗੇ ਦੇ ਜਾਣਗੇ ਖੁਸ਼ੀਆਂ ਹਜ਼ਾਰ

ਖੋਹਲ ਰਖ ਦਰ ਦੋਸਤਾਂ ਲਈ ਹਰ ਘੜੀ ਮੇਰੀ ਤਰਾਂ

ਗ਼ਜ਼ਲ

ਦਿਲ 'ਚ ਬਲਦੀ ਅੱਗ ਦੇ ਡਰ ਤੋਂ, ਖਾਮੋਸ਼ੀ ਖਿੱਲਰੀ ਹੈ

ਯਾਰ ਦੇ ਖਤ ਦੇ ਹਰ ਅੱਖਰ ਤੋਂ , ਖਾਮੋਸ਼ੀ ਖਿੱਲਰੀ ਹੈ

ਆਪਣੇ ਇਕਰਾਰ ਦਾ ਦਿਨ ਆਓਣ ਦਾ ਵੇਖ ਇੰਤਜ਼ਾਰ

ਨਜਰ ਨਹੀਂ ਹਟਦੀ ਕਲੰਡਰ ਤੋਂ , ਖਾਮੋਸ਼ੀ ਖਿੱਲਰੀ ਹੈ

ਤੇਰੇ ਹੰਝੂਆਂ ਨਾਲ ਇਸ ਖਾਤਰ ਨਹੀਂ ਹੁਣ ਪਿਘਲਦਾ ਮੈਂ

ਡਰ ਰਹੀ ਤੇਰੇ ਅਡੰਬਰ ਤੋਂ , ਖਾਮੋਸ਼ੀ ਖਿੱਲਰੀ ਹੈ

ਰਾਤ ਦੇ ਤੂਫਾਨ ਦਾ ਕੀ ਸ਼ਹਿਰ ਨੇ ਦੱਸਣਾ ਏ ਹਾਲ

ਪੜ੍ਹ ਰਹੇ ਨੇ ਲੋਕ ਖੰਡਰ ਤੋਂ, ਖਾਮੋਸ਼ੀ ਖਿੱਲਰੀ ਹੈ

ਸ਼ੌਕ ਦੇ ਰਾਹਾਂ ਚੋਂ ਹੁੰਦੀ ਮੇਰੇ ਬੂਹੇ ਆ ਖਲੋਤੀ

ਤੂੰ ਜੋ ਤੋਰੀ ਆਪਣੇ ਦਰ ਤੋਂ, ਖਾਮੋਸ਼ੀ ਖਿੱਲਰੀ ਹੈ

ਤੇਰੇ ਕੋਲੋਂ ਦੂਰ ਜਾ ਕੇ ਜਾਪਦਾ ਹੈ ਇਸਤਰਾਂ

ਦੂਰ ਹੋਇਆਂ ਹਾਂ ਸਮੁੰਦਰ ਤੋਂ , ਖਾਮੋਸ਼ੀ ਖਿੱਲਰੀ ਹੈ

ਦਰ ਤੇਰੇ ਮਥਾ ਘਸਾ ਤਰਲੋਕ ਨੇ ਕੀ ਖੱਟ ਲਿਆ ਹੈ

ਆਸ ਰਖ ਬੈਠਾ ਹਾਂ ਪੱਥਰ ਤੋਂ , ਖਾਮੋਸ਼ੀ ਖਿੱਲਰੀ ਹੈ

"ਮਿੱਤਰ - ਉਸਤਤ" ਸ਼ਸ਼ੀ ਸਮੁੰਦਰਾ ਲਈ

ਹੇ ਸ਼ਸ਼ੀ ! ਹੇ ਪਿਆਰ ਸਾਗਰ
ਹੇ ਸ਼ਸ਼ੀ ! ਹੇ ਮੋਹ ਦਾ ਮੰਦਿਰ
ਕੋਈ ਵਰ ਦਿਹ
ਵਰ ਲਵਾਂ ਮੈਂ ਖੁਸ਼ੀਆਂ ਦੀ ਸੁਗਾਤ ਨੂੰ
ਝੀਲ ਨੈਣਾਂ ਦੀ 'ਚ ਡੁੱਬ ਕੇ
ਆਪਣੀ ਭੁੱਲ ਔਕਾਤ ਨੂੰ
ਮੋਹ ਦਿਆਂ ਮੰਡਲਾਂ 'ਚ ਉੱਡਾਂ
ਮੈਂ ਗਮਾਂ ਦੀ ਰਾਤ ਨੂੰ
ਹੇ ਸ਼ਸ਼ੀ ! ਹੇ ਪਿਆਰ ਸਾਗਰ