ਨਤੀਜਾ ਨਿਕਲਿਆ ਤਾਂ ਢੇਰ ਸਾਰੇ ਤਬਸਰੇ ਹੋਏ
ਅਸੀਂ ਜੇ ਫੇਲ ਵੀ ਹੋਏ ਤਾਂ ਕਿਓਂ ਚਰਚੇ ਬੜੇ ਹੋਏ
ਬਣੇ ਜੇ ਕਲਮ ਤਾਂ ਉਹਨਾਂ ਸਿਆਹੀ ਵੀ ਲੁਕਾ ਛੱਡੀ
ਬਣਾ ਕੇ 'ਚਾਕ' ਮੈਨੂੰ ਤੇ ਉਹ ਕੁਝ ਲਿਖਕੇ ਪਰ੍ਹੇ ਹੋਏ
ਉਹ ਜੋ ਦਸ੍ਤੂਰ ਦੁਨੀਆਂ ਦੇ ਚਿਰਾਂ ਤੋਂ ਸੀ ਚਲੇ ਆਓਂਦੇ
ਮੇਰੀ ਵਾਰੀ ਜਦੋਂ ਆਈ ਤਾਂ ਵਖਰੇ ਸਿਲਸਿਲੇ ਹੋਏ
ਨਜਰ ਵਿਚ ਦਿਲ ਟਿਕਾ ਕੇ ਇਸ ਗਲੀ ਨਾਂ ਲੰਘਣਾ ਸੱਜਣ
ਕਿ ਏਧਰ ਹਾਦਸੇ ਵਸਦੇ , ਚਿਰੋਕੇ ਵਾਪਰੇ ਹੋਏ
ਉਦਾਸੀ ਇਸ ਤਰਾਂ ਵੱਸੀ ਹੈ ਸਾਹਾਂ ਮੇਰੀਆਂ ਅੰਦਰ
ਮੇਰੇ ਸ਼ੇਅਰਾਂ ਨੂੰ ਪੜ੍ਹ ਕੇ ਦੋਸਤਾਂ ਨੂੰ ਤੌਖਲੇ ਹੋਏ
